India chuan tun sorkar kum kal mek, April-January inkarah hian ram dangah Rs. Vaibelchhe 11,728.36 man zet wheat hi a thawn chhuak tawh tih sorkar chuan Thawhlehni khan a sawi.
Nikum May thla khan sorkar hian ram chhunga wheat tam zawk chhek a nih theih nan leh a an thunun nan ram danga thawn chhuah hi a lo khap tawh a. Lok Sabha rorel inkhawma Union Agriculture Minister Tomar-a’n zawhna a chhannaah, “Tun dinhmunah wheat thawn chhuah khapna hi hlih tumna a la awm rih lo,” a ti.
“Tangka kum kal meka January, 2023 thleng khan Rs. Vaibelchhe 11,728.36 man hu thawn chhuah a ni tawh,” a ti bawk.
Ram danga thawn chhuah khapna kalpui mek ni mah se sorkar chuan May 13 leh a hma lama Irrevocable Letter Of Credit (ILOC) awm sa chu thawn chhuah tho a ni tih a sawi a ni.
Tomar chuan kum 2022-23 chungin wheat chu tonne maktaduai 112.18 thar thei tura inbeisei a nih thu a sawi a, hei hi 2021-22 chhunga thar aiin tonne maktaduai 4.44-in a tam zawk tih a sawi bawk.
ICAR-Indian Institute of Wheat & Barley Research (IIWBR), Karnal-in State Agricultural Universities (SAUs) leh Krishi Vigyan Kendra (KVK) nena tanghova an thlithlai kualnaah wheat chin leh thar chhuah chu a pangngai ang a ni dawn tih an sawi lawk tih minister chuan a sawi bawk a. Hetiang a nih avang hian beisei ang zat hi thar chhuah ngei a rinawm niin a sawi.