Aizawl: Mizoram Consumers’ Union (MCU)-in nimin khan Central YMA Hall, Aizawlah ‘World Consumer Rights Day’ an hmang a, Food Civil Supplies & Consumer Affairs (FCS&CA) Minister K. Lalrinliana’n a hmanpui.
FCS&CA minister chuan mipuite chu consumer an nih thu sawiin, comsumer-te dikna chanvo leh hamthatnate ngai pawimawh tur a nih thu a sawi a. India sorkar pawhin consumer-te hamthatna ngaihtuahin kum 2019 khan Consumer Protection Act a lo siam tawh tih a sawi.
Sumdawngte leh anmahni dawrtu mipui inkarah thawhhona tha a tul thu pawh FCS&CA minister chuan a sawi a. Mipuite chu thil lei kawngah an fimkhur zual a ngai tih sawiin, thil man zat (MRP), a siam ni leh thih ni, cash memo leh receipt lak thu-ah pawh tan lak thar a tul thu a sawi a. Sumdawngte pawhin dik tak leh hlemhletna tel lova thil an hralh a pawimawh thu a sawi.
FCS&CA minister chuan consumer-te harsatna sutkianna turin consumer redressal commission a awm thu sawiin Consumers’ Union-te pawh mipuite harsatna sukiang tura tan la thar leh turin a chah a. Consumer-ten awlsam zawka lungawi lohna (complaint) an thlen theihna tur online application, eDaakhil chu kum 2022-ah hawn ni tawh mah se, hmangtu an la tlem hle tih sawiin, mipuite chu uar zawka hmang turin a sawm bawk.
World Consumer Rights Day hi Mizoram district hrang hrangah pawh an hmang a ni.