Aizawl: Nimin chhuna Mizoram hmun thenkhata thlipui leh ruah thimpui thawkin hmun hrang hrangah chhiatna tenau a thlen nia thudawn a ni.
Aizawlah chuan chawhnu her, dar 1:30 vel khan ruah thimpui thawkin, chhun laiah khua a thim mup a, khaw thim hi a chhah hle, lirthei tlante pawhin headlight an chhit a ngai hial a; ruah sur erawh a tam lutuk lo thung.
Hmun thenkhatah chuan rialte a tla a, thli pawh a na hle a, inchungte hawkin thing tlu leh thingzar tliak a awm nual a, power pek khaihlak phah a awm nual bawk.
Mamit district-ah hriat theih chinah thli-in DC office hnathawkte quarters chung pathum a la a, khawpui chhung electric pekna hrui chat leh herh a awm nual a. Tuidam-ah in paruk a chhia a, Tuirum-ah in pahnih a chhe bawk.
Kolasib, Saitual, Khawzawl leh Champhai lamah pawh ruah sur mah se a tam lo thung nia thudawn a ni a. He thu buatsaih lai thleng hi chuan chhiatna thleng hriat a ni lo.
Nimin ruahsur kha Mizoram hmar lamah a thawk hmasa deuh niin a lang a, Serchhip, Lunglei, Lawngtlai leh Siaha lamah tlai lamah a thawk a, ruah a tam lem lo va, hmun thenkhatah chuan rialte pawh a tla a ni.
Regional Met. Centre, IMD, Guwahati chuan Pathianni thleng khian Mizoram hmun thenkhatah ruah tlem sur thei a nih thu leh Zirtawpni thleng hian hmun thenkhatah ruah leh thli na vak lo thawk thei niin a tar lang a ni.