Inter Milan chief executive officer Giuseppe Marotta chuan an striker Romelu Lukaku chu Chelsea atangin season tawpah a nghet a an lei loh tur thu a sawi chiang.
Marotta chuan an Belgian striker chungchang hi Thawhlehni zana FC Porto nen an inkhelh zawhah a sawi a. “Kan loan hi June 30 thleng tur a ni a, hetih chhung hian tha takin lo khel pawh nise Chelsea-ah a kir ang.”
“Kan season hmanlai hi kan la tawn ngai loh a ni. World Cup a awm a, hei hian keini chauh ni lovin club zawng zawng tan harsatna a siam a, player te pawh a nghawng vek. Lukaku pawh hi chung zingah chuan a tel a, ani chauh ni lovin Brozovic te pawhin ngai an awh lo vek.” tiin a sawi.
Belgian forward hian Chelsea atanga Inter a pan leh hnuah tun season-ah vawi 17 chauh inkhelin goal nga a khung tawh.