Milwaukee Bucks in tun regular season a hnehna chan harsatna ber pawl Phoenix, Arizona a Footprint Center-ah Phoenix Suns an hmachhawn a. Halftime hma deuh atang hmahruaitu niin a tawp thlengin an hruai tlang a, 116-104 in hnehna an chang.
Bucks hian tun regular season-ah khelh 69 atang vawi 50 an chakna a ni a. NBA Playoffs khel tura tling hmasa ber an ni.
Tunhnai thla hnih chhunga game 23 atanga 21 chak thei Bucks tan Giannis Antetokounmpo chuan point 36 a score a, Brook Lopez chuan point 21 a score thung.
Bucks coach Mike Budenholzer chuan, “Inkhelh hma in kan sawiho a, playoffs khelh hi he league-ah hian a harsa, chuvangin kan dinhmun tihchian vat a pawimawhzia kan inhrilh.” tiin inkhel zawhah a sawi.
Suns hi a zawna vawi thum an tlawmna a ni ve thung.