Aizawl : PC party President Vanlalruata’n ram leh mipuite tana ṭha zawk leh mil turin dan (law) palzût chin an nei dawn niin a sawi.
Nimina PC party hruaitute thutkhawmah he thu hi PC party President chuan a sawi a. “PC party-in ram hruaina kawnga kan hmalakna turah ram leh mipui tana ṭha zawk leh mil turin dan (law) palzût chin kan nei dawn a ni,” a ti.
PC party President chuan “Sorkar laipuiin rampum behchhana dan a siam te hi kan ram, hnam leh sakhaw himna tiderthawng thei thil a awm a nih phawt chuan palzût chin emaw, a ram leh mipuite duhdàn mila siamrema ennawn a ni ang,” a ti a; “Rental act siamṭhaa, Law commission nuaibovin, dan thar siama Directorate of Prosecution dinin thubuai hrang hrang chinfel chak a nih theih nan Fast Track Court din a ni dâwn” a ti bawk.
Zu chungchâng dan siamṭhain zuchhia pawh an ti bo dawn niin Vanlalruata chuan a sawi a. “A mamawhtute tan zu ṭha lei tur kan awmtir ang a, reserve forest ṭhenlai hi ram tana hmasawnna liantham (infrastructure) tluang taka kalpui theihna tur atan kan de-reserve ang a; dan ṭhenkhat palzûtin Aadhaar card neilo sorkar hnathawk te hian Card nei te hamṭhatna dawn zawng zawng an dawng ang tih leh a dang tam tak te siamrem tur a awm,” a ti bawk a ni.