Aizawl : Health Minister Dr R Lalthangliana chuan thawhlehnia HIV/AIDS do kawnga inrawnkhawmna neihah HIV/AIDS-in Mizo thalaite a suat nasat avangin a do let kawngah department pakhat hmalaknaa thawh zawh rual a nih loh avangin tan khawm a pawimawh thu a sawi.
Thawhlehnia UNAIDS, UNICEF leh stakeholders hrang hrang te kalkhawmna Multi Sectoral Stakeholders Consultation on HIV /AIDS in Mizoram Meeting, Secretariat Conference Hall a neiha hun kaihruaitu Health Minister hian, HIV/AIDS in Mizote, a bik takin thalaite a suat nasa a, India ramah pawh a percentage-a AIDS vei tamna ram a nih avangin theihtawp chhuaha do a tul tih a sawi.
Dr R Lalthangliana chuan, “He natna do tur hian department pakhat hmalakna a thawh zawh rual ani lo va; chuvang chuan tan khawm a pawimawh a ni,” tia sawiin, Kohhran, NGO leh department hrang hrangte chu Covid-19 do lai a thawh hona a awm ang khan HIV do tur hian theihtawp chhuah ho leh turin a ngen.
MSACS atanga Project Director Dr Lalthlengliani’n a tar lan danin, Mizoramah AIDS hi mipat hmeichhiat hman khaw lohna leh ruihtheihthil timi te’n hriau thianghlim lo inhman tawm atanga kai an tam ber niin a sawi a. AIDS vei tam ber chu kum 25-34 inkar a ni a, kum 35-49 in a dawt a ni.