Brentford tan striker Ivan Toney a che tha chhunzawm a, goal khat a khung bakah goal dang siamsakin table mawngphah a awm Southampton lakah hnehna an chang.
Nilaini zana St. Mary’s Stadium a inkhelah Toney hian minute 32-naah Bryan Mbeumo corner atanga Christian Norgaard-a’n a tana ball a thai rem sak chu a khung a. Second half tawp dawn lamah Yoane Wissa goal khung turin ball a tauh lut bawk.
Hnehna an chan avangin Bees hi table-ah pariatnaah an chho a. Point ruk chauhin a sang pali an pha lo mek.
Saints hi a mawngphah ah la awmin dinhmun him point hnihin an la hlat a, an elpuite aiin khelh khatin an khel tam zawk.
An goal khungna remchang tha ber chu Che Adams hnenah tla in Bees goalkeeper David Raya tan chet ngaihna awm tawh lo hman mahse Adams goal khung tur hi Brentford defender Aaron Hickey chuan a dang.
Inkhel dangah Brighton in pasarihna luah chhunzawmin 1-0 in tunhnaia talbuai Crystal Palace an hneh.
Brighton tan hian minute 15-naah Solly March chuan inkhel a goal awmchhun a khung.
Palace hi tunhnaiah a zawna 1-0 a an tlawm vawi thumna a ni a. A tir minute 10 chhungin chance tha vawi thum lai nei mahse goal-ah engmah an chantir thei lo.