European football a striker ngaihven hlawh ni mekte zinga hming ri ring ber pawl Victor Osimhen chuan amah ngaihventute tan a theihna a pholang leh a. Napoli tan goal hnih khungin UEFA Champions League quarter-final a vawikhatna atan a club a hruai thleng.
Stadio Diego Armando Maradona-ah German club Eintracht Frankfurt nen an inkhel a. First leg-ah Italian club hi Germany-ah 2-0 in an chak tawh.
Inkhelh hma in Naples khawpuiah German club tantute zingah uchuak taka che an awm a, khawpuiah buaina siamin hei hian ngaihven a hlawh.
Khelmual chhunglam erawh nghawng thui lem lovin Nigeria striker in halftime dawnah inkhel a goal hmasa ber a tauh lut a. Quarter-final a an hmun a tichiang tluk a ni.
Second half tan atanga minute riat a liam hnuah Giovanni di Lorenzo cross chu goal-ah a khung chhunzawm.
Midfielder rinrawl Piotr Zielinski chuan penalty hlawhchhuak bawkin aman an goal thumna ni turin a khung.
Napoli hi Italy-ah point 18 a hma hruai lai an ni a, champion tura ngaih an ni tawh.
Europe huap inelna lianah pawh an chetthat hi chhunzawmin goal 24 pali an khung tawh a, anni aia goal khung tam hi an awm lo.
Striker Victor Osimhen-a’n tun season-ah inelna hrang hrangah match 28 atangin goal 23 a khung tawh a. Europe club lianten an ngaihven nasat chhan a lang.
Coach Luciano Spalletti chuan, “Inkhel hautak a ni chungin Napoli chanchin a bung thar duhawm tak kan kai a ni. Kan fans te leh keimahni theuh pawh kan lawm tlang hle.” tiin a sawi.