Tropical Cyclone Freddy chuan kar tawpah khan Africa khawmualpui chhim lam chu a vawi hnih nan a nuai a, Malawi, Mozambique leh Madagascar-ah te mi 220 chuang zet an thih phah.
Thawhlehni chawhnu khan Malawi-a thuneitute chuan mi 190 thi an awm tawh thu leh mi tam tak hliam leh chin hriat loh an awm tawh thu an sawi a. An thenawm, Mozambique-ah mi 20 an thi bawk.
Thi tam ber hi Malawi khawpui lian ber dawttu, tlangrama awm, Blantyre-a lei min vang a ni a. Ruah tam tak sur chuan chenna in tam tak tichhiain thingkung pawh a tlu nasa hlea. Kawngpuite pawh kawr ni awm takin tuiin chimin a luang nasa hle a, leite pawh a la nual a ni.
“Ni thum lai chin hriat lohva awmte chu an awm ta,” tiin Al Jazeera chuan a tar lang a. Lei min karah ruang zawn hna thawkin lei an la lai mek zel bawk.
“Mi chengte chuan chhanchhuah hna thawktu pangngai an awm loh avangin anmahniin bo zawn leh mi puih hna an thawk a ni,” an ti bawk a. Thawhtanni khan police chu an thleng a; mahse, tih theih an neih tam bik loh avangin an let leh thuai a ni.
Freddy hi mi 60,000 velin an tuar a, mi 19,000 zet an chenna in la luah thei lo an awm niin Malawi sorkar chuan a sawi.
Blantyre-a Doctors Without Borders emergency coordinator Rasmane Kabore chuan tui thianghlim in tur awm lo chu an buaina lian ber pakhat a nih thu leh tui hri a len mai an hlau hle tih a sawi.
Malawi-ah hian nikuma Cyclone Anna-in an ram chhim lam a nuai hrep hnuah khan tuihri a leng chiam nia sawi a ni.
“Damdawi inte chu tuihri veite tam zawk enkawlna tur tam zawk a awm theih nan kan buaipui a, khawpuiah tui a awm miau loh avangin hri kai hi an pung dawn tih kan hria a ni,” tiin Kabore chuan a sawi.
“Damdawi pawh a let chah niin thawktu pawh damlo tam zawk enkawl thei tura inbuatsaih fel tawh a ni,” a ti bawk.
Freddy hi Indian Ocean chhim lam, Australia tuipui kam atanga insiam niin km 8,000 chuang a kal hnuah February thla tawpah khan Madagascar leh Mozambique a nuai.
Chawlhkar hnih liam hnuah Mozambique nuai nawn lehin Malawi pawh a hrut zui leh ta a ni.