Central Bureau of Investigation (CBI) lung ina tang mek, Aam Aadmi Party (AAP) hruaitu, Manish Sisodia chu Delhi sorkar hnuaia Feedback Unit (FBU)-ah ei rukna awmah thubuai an siamsak belh.
FBU hi AAP-in kum 2015-a Delhi-a sorkarna an siam tirah an din a ni.
“Dan lova FBU din leh hna a thawh nan hian sorkar chuan Rs. Nuai 36 vel sum a hloh a ni,” tiin CBI chuan an sawi.
AAP hruaitu laka thubuai siamsak leh a nih hian Delhi Chief Minister Arvind Kejriwal chuan na takin a sawisel nghal a, ‘ram tana lungchhiatthlak’ a nih thu a sawi.
“PM hian dik lo takin Manish hi thubuai siamsakin rei tak tantir a tum a, ram tan pawh a lungchhiatthlak tak zet a ni,” tiin Kejriwal hian Twitter-ah a tar lang.
Delhi deputy chief minister hlui, Sisodia hi February 26 khan CBI-in tuna tihtawp leh tawh, Delhi excise policy siam leh kalpuiah ei rua puhin a lo man tawh a ni.