Colombia ram laili, Cundinamarca governor chuan lungalhthei laih chhuahna khur puakah mi 11 vel an thi tih puangin mi 10 dang chu a chhungah an la tang mek bawk.
An ram khawpui, Bogota hmar lam km 74 vela hla, Sutatausa-a thil thleng hi a chhunga boruakalhthei awm chu hnathawktute hmanraw hman avanga kangin a puak ta niin Governor Nicolas Garcia chuan Blu Radio hnenah Nilaini khan a sawi.
A puah hun hi Thawhlehni zan tlai tawh takah niin dan anga khur siam tam tak nena inkalpawh theihna laiah a ni.
“Lei hnuai metre 700 atanga 900 inkar velah mi tang an la awm a ni,” tiin Garcia chuan thuthar lakhawmtute hnenah a sawi a. Pahnih chu dama lak chhuah tawh niin pasarih dang pawh puih ngai lovin an chhuak thei tih a sawi.
Tual chhung chanchinbuten thlalak an thehdarhah chuan kangthelhtu leh chhan chhuah hna thawktu dangte chu khur luhna velah an tam hle a, an lainate chanchin ngaichangin khura thawk chhungte an awm bawk.
Governor chuan thawktu 100 chuangin la tangte lak chhuah tum hian an thawk mek zel tih a sawi.
“Minute tin a liam hian oxygen a tlem zel tihna a ni,” a ti.
Colombian President Gustavo Petro pawhin he thil thlengah hian mi 11 an thih thu Twitter-ah a tar lang a, ‘chhiatna’ tiin a sawi bawk.
“A la tangte pawh dama lak chhuah ngei tumin Cundinamarca sorkar nen kan thawk zel a ni,” a ti a. “A tuartu leh an chhungte kan tawrhpui tak zet a ni,” a ti bawk.