Assam Chief Minister Himanta Biswa Sarma chuan thla hmasaa sorkarin kumtlinglova nupui pasal neih titawp tura hma a laknaah chuan sakhaw tum bik a neih loh thu a sawi a, man zingah Muslim leh Hindu an inzat thuak tih a sawi.
Budget session neih mekah Ningani khan hei hi sawiin kumtlinglo inneih titawp tur hian a vai hna chu thla ruk dan zelah an neih tur thu leh kum 2026-ah chuan naupang inneih chu an state-ah tihtawp vek a nih tawh tur thu a sawi.
February 3 atanga an man zawng zawng zingah Muslim chu 55% an nih thu leh Hindu chu 45% an ni bawk tih a sawi.
“Eptute hian thil tha lo tak an hrilh cheu avangin kan mite thenkhat hian thil an sawi nasa a. Muslim leh Hindu man zat hi a inzat thuak a ni,” tiin state assembly thutkhawma larsap thusawia lawmthu sawina, Vote Of Thanks a puh luh a sawinaah a sawi.
Chief minister chuan mite chu ‘dan bawhchhiate tana tapin hmeichhe naupang kum 11 nau pai thei lo tan an tap leh si lo,’ niin a sawi bawk.
“The NFHS 5 (National Family Health Survey)-in a tar lan danin kumtling lova inneih hi Dhubri leh South Salmara (Muslim tamna district ve ve)-ah an tam a, Dibrugarh leh Tinsukia-ah a ni lo. Mahse, engkim sakhaw thila in ngaih zel dawn chuan Dibrugarh Superintendent of Police biain lo man ve turin ka hrilh mai ang. NFHS 4-ah khan Congress hun lai niin kumtlinglo innei leh naupang fa nei kha Assam chuan hnuai district (Muslim tamna tho)-ah an tam hle bawk,” tiin Sarma chuan a sawi.
National Health Mission erawh chuan naupang innei hi South Salmara and Dhubri-ah an tam tih a tar lang a, Dibrugarh SP chu ‘miin sakhaw tih bik nei’ tia an sawi hnuah pahnih thum chu man ve turin a ti tih a sawi bawk.
Eptu party-te chuan BJP kaihhruai sorkarin Prohibition of Child Marriage Act, 2006 (PCMA) leh Protection of Children from Sexual Offences Act, 2012 (POCSO) tlawhchhana kumtlinglova inneia mi a puh chiam chu an ngaithiam lo hle a. Congress MLA Abdur Rashid Mandal chuan assembly inkhawmah sorkar chuan dan pahnih tlawhchhanin sorkarin mipuite a ‘tihrehawm’ niin a sawi.
Independent MLA Akhil Gogoi-a zawhna a chhannaah Assam chief minister chuan Thawhtanni khan naupang inneihna hi April, 2021 leh February, 2023 inkarah vawi 4,111 a thleng niin a sawi.
“Thubuai 4,670 ziah luh niin hming lang 7,142 an awm a. An zinga mi 3,483 chu man tawh niin mi 1,182 chu lung ina dah niin mi 2,253 chu bail-a chhuahtir an ni a, mi 48 hnenah kohna pek an ni tawh,” a ti bawk.
Sarma chuan MLA rualte hnenah hian sorkar chuan kumtlinglova inneite kara fa piang enkawlna lam a ngaihtuah lo tih a sawi a; mahse, mamawh leh an himna tura tih tur a awm a nih chuan an inhawng reng tih a hrilh bawk.