Aizawl : Mizoram state AIDS control society (MSACS)-in tun thla ni 4 khan Delhi atanga chhuak Times of India-ah India hmarchhak state ten HIV damdawi supply a tlem avangin harsatna an tawk nasa niin an ziak niin an sawi a, hei hi thu belhchiandawllo a nih thu an sawi.
MSACS hotute chuan HIV damdawi tlachhama an la awm loh tuh leh tlakchham hlauhthawnawm dinhmunah pawh an la din loh thu an sawi a. HIV damdawi AL-Adult chu tuna a mamawhtu zat atanga chhutin thla khat ei aia tam an la nei nia sawiin, ATV/r pawh ART centre hrang hrangah thla 6 aia tam tla tur an la nei niin an sawi bawk.
Damdawi te chu lo thleng hnai mai tur leh tun thlaa lo thleng mai tur te pawh a awm niin MSACS chuan an sawi a. Damdawi lo thleng tur te a lo thlen hmaa chatlak lo tura neih sa an neih thu an sawi.
MSACS hnuaiah supply chain management committee an awm thu leh an ni hian indaihloh palh hlauhthawmawm deuha an awm pawhin hma an la thuai a, harsatna awm te an chingfel thuai thin niin an sawi a. Damdawi awm zat te pawh state leh ART centre tinah enfel reng țhin a nih thu sawiin, a thawn chhuah leh sem rual kawngah pawh State AIDS control society leh supply chain management te, Natioanl AIDS control society (NACO) te hunbi neia inrawnin, stock dinhmun te an thlirho thin thu an sawi.
MSACS chuan chanchinbu report chu finfiahna awm lo leh a hmuna thil awmdan enfiah lova siam nia a lan thu sawiin, chiaina tur a awm loh thu an sawi bawk a ni.