Ningani khan Lalhmingmawii Rawihte lehkhabu ziah, ‘Kan fate tan’ tih chu Information & Public Relations Minister Lalruatkima chuan Aizawl Press Club-ah a tlangzarh.
Tlangzarhna inkhawmah hian Lalruatkima chuan lehkhabu a tlangzarh tak chu nu leh pa leh naupangte tan lehkhabu tangkai tak a nih a beisei thu a sawi a. “Mizo pi leh pute sulhnuah entawntlak leh thawnthu buatsaihna tham tling tam tak a awm a, hei hian Mizo literature a tihausain, a tihlu zual hle a ni,” a ti.
Lalruatkima hian Mizo nunphung hrang hrangte chu khawvel thiamna sang zelin a thlak danglam mek thu a sawi a. “Chhungkaw inhmangaihna, induhsakna leh inpumkhatna te a lo par vul leh theih nan chhungkuaah inzirtirna tha a awm a ngai,” a ti a. Mizoram chu a la chhiat vek loh thu sawiin, mite thatna hmuhsak a, fuihphur leh dawmkangtu ni theuh turin kalkhawmte chu a sawm.