Aizawl: Parliament Session neih mekah Union Environment, Forest & Climate Change Minister Ashwini Kumar Choubey chuan Lengpuia NIT permanent campus dinna tur chungchang Mizoram MP (RS) K.Vanlalvena zawhna a chhang.
Union minister chuan, “Lengpui hmuna NIT Permanent Campus dinna tura forest clearance pek leh pek loh chungchang chu June 31, 2022-a Forest Advisory Committee meeting-in Mizoram sorkar atangin ngenna lut chu an thlir tawhin, thil pawimawh dangah Mizoram sorkar atanga chhanna nghah mek a ni,” a ti.
January 22, 2020 khan Lengpuia NIT Permanent Campus din a nih theih nan hian union cabinet meeting chuan Rs Vbc 669.75 a sanction tawh a. NIT campus dinna tur hian Rs vbc 334.78 hman tawh a ni.
Forest department-in ‘Reverine Reserved Forest a ni,’ tia complaint an siam avangin tun thlengin hna thawh chhunzawm theih a ni lo a, sorkar laipuiin sum a sanction tawh atangin Rs vbc 334.97 chu khawih chet theih lohin a la awm ta reng a ni.
NIT Campus, Lengpui hmuna forest reserve tihchhiat aiah hian Mizoram sorkar chuan hmun dangah forest reserved zau zawk a siam tawh a. Lengpuia NIT hmun forest reserved nena inthleng dilna pawh Mizoram sorkar hian sorkar laipuiah January 24 khan a lo thlen leh tawh bawk.