Poland chuan Soviet hun laia siam, Mig fighter jet pali chu Ukraine-ah a thawn dawn a, Nato ram zinga nikuma Russia-in a rûn hnua thlawhna pe hmasa ber a ni dawn.
Polish President Andrzej Duda chuan ni reilo te-ah an thawn nghal dawn tih a sawi a, a dang pawh thawn zel a ni dawn tih a sawi.
Ukraine tan chuan vansang lama invenna tangkai tak a ni thei dawn a, indonaah hian indo thlawhna dang dawn tur a nei hnai vak lo a ni.
Ukraine parliament-a deputy speaker Olena Kondratyuk chuan ram dangte pawhin an pek zui ve ngei a beisei thu erawh a sawi.
Nato ram dangte pawhin Soviet hun laia siamte hi pek an tum thu an sawi tawh thin a, heng thlawhnate hi Ukrainian pilot-ten an khalh thiam sa a ni.
Ukraine hian khawthlang ramte hnenah hian tun lai deuh indo thlawhna, F-16 ang chite pe turin a lo dil tawh thin.
UK pawhin Ukrainian pilot-te chu Nato-in an hman thlawhna khalh a lo zirtir tawh a; mahse, inzir chhung a rei avangin khawthlang ram indo thlawhnate chu nakin zel atana mamawh tur chauh a la ni thung.
US President Joe Biden-a pawhin an ram thlawhnate Ukraine-a thawn an tum loh thu a lo sawi tawh.
Russia-in a rûn tan lai vel khan Ukraine hian indo thlawhna 120 vel, chu pawh upa tawh tak tak, Mig-29 leh Su-27 a nei nia hriat a ni.
President Duda chuan Poland hian Soviet hun laia mi Mig 29 hi eng emaw zat an la nei tih a sawi.
Ukrainian MP Kira Rudik chuan, “Kan air defence system tihchak nan leh kan sipaiten thala an nawr let nan kan mamawh hle,” tiin BBC a hrilh.
Ukrainian defence minister adviser, Yuriy Sak pawhin Polish thlawhnate chu ‘kan airforce tan a tangkai hle dawn’ tiin a sawi.
Darkar 24 liam ta chhungin Ukrainian air force hian Russian mite leh an hmanruate tum 16 an kap tih a sawi a; mahse, tun laia hman lar indo thlawhnate an duh ve hle tih a sawi.
Poland hi Ukraine lamtang tha tak niin sipai hmanrua pawh pe hnem ber zinga mi a ni a. Tunah hian Soviet hunlaia siam an thlawhnate chu a thar zawk, American leh Korean model hmangin an thlak mek a ni.