Russian chanchinbute chuan an ram chhim lama Rostov-on-Don khawpuia Federal Security Service (FSB) building kangin mi pakhat a thi a, mi dang pahnihin hliam an tuar bawk tih an tar lang.
Social media-a video thehdarhah chuan kang hi a nasa hle a, a khu pawh khawpui pumah a zam darh.
Rostov region governor chuan short circuit avanga intan a nih thu leh hei hian tuialhthei dahna (fuel tank) a man ta niin a sawi.
Building awmna kawtthleng chu khar nghal a ni.
Kangmei hi FSB hnuaia regional border patrol section-in an luah lai building-a chhuak a ni.
FSB hi Russia-a an ram chhung himna lam changtu, internal security service niin counter-intelligence, ramri himna leh firfiaka chete beihna lama thawktu an ni.
Rostov Governor Vassily Golubev chuan sq m 800 chuanga zauvah kangin bang pahnih a tlu tih a sawi.
FSB public relations office-in thuchhuah a siamah chuan kangmei hi Ningani chhun dar 12:30 (India-a India-a chawhnu dar 3:00) vela intan a ni a. Thi an awm thu a tar lang a; mahse, chiangin a sawi lo.
Mei hi tlai dar 4:00 (India-a tlai dar 6:30)-ah thelh mih a ni tih Russian chanchinbute chuan an tar lang.
Kangmei chhuahna khawpui hi chhim lama Rostov region khawpui niin Ukraine-a indona a nasatna lai, Donetsk leh Luhansk region nena inri a ni.
February, 2022-a Ukraine a rûn hnuah Russia-a sorkar hmun pawimawh tak takte hi beih leh kang a awm nual tawh.
Ukraine chuan tun tuma kangmei chhuakah hian inrawlhna a nei lo tih a sawi.
President thawhpui hnai, Mykhaylo Podolyak chuan thil thleng hi Russia-a ‘mi tihchiai tumna mai’ a nih thu Twitter-ah a tar lang a. “Ukraine a inrawlh lo va; mahse, kan thlithlai reng ang,” a ti.