Aizawl: Gauhati High Court, Aizawl Bench-in Sarva Shiksha Abhiyan (SSA) hnuaia zirtirtu, Mizoram SSA Teachers’ Association (MSSTA)-a telte chu state sorkarah dah nghet turin Mizoram sorkar a hriattir.
MSSTA chuan kum 2018 khan SSA zirtirtute dah ngheh an nih theih nan Gauhati High Court-ah Mizoram sorkara education department an khing a. Hemi chunchang hi high court-a ngaihtuah a nih hnuah thuremna mumal awm lovin khinna thu hi a tawp a, MSSTA chuan September 18, 2019 khan education department khinna a thehlut nawn leh a, he thubuai hi rei tak ngaihtuah a nih hnuah nimin khan court chuan thuremna a puang ta a ni.
Court thuremnaa tar lan a nih danin Mizoram sorkar hnuaia primary leh middle school teacher post ruak mekah scheme siamin SSA hnuaia zirtirtu thawk mek, MSSTA member-te chu dah nghet turin state sorkar a hriattir a ni.
MSTA-ah hian member 1,206 an awm mek.
Thudawn danin RTI hmanga zawhna education department-in an chhan danin December 7, 2022 thleng khan Mizoram sorkar enkawl primary school-ah post ruak 1,118 a awm mek a, middle school-ah zirtirtu post ruak 1,108 a awm bawk a ni.