Aizawl: MNF Thalai President Dr L Thangmawia, MLA chuan sawiselna tam tak karah rilru lam en thintu Pathianin Chief Minister Zoramthanga kaihhruaina hnuaiah hneh takin sorkar a pe leh dawn niin a sawi.
Zirtawpnia Mizo Hnam Run-a chhung inkhawmah thu sawiin Dr L Thangmawia chuan Chief Minister Zoramthanga hi chief minister nih tum vang ni miah lovin, kum 1966 khan Mizo hnam tan thih huamin a pen chhuak a. Kum 20 chuang zum leh hriam, silaimu karah Zoram tana rinawm taka thawkin tun hun hi Pathianin a hruai thleng nia sawiin, “Sawiselna tam tak karah rilru lam en thintu kan Pathian hian a kaihhruaina hnuaiah hian hneh takin sorkarna min pe leh ngei dawn,” a ti.
Kumin kumtawp inthlanpuiah Congress party an nil mai ang tih a hlauhawm tih sawiin MNYF president hian, “Tunah hian central-ah Congress hi an tho leh mai rih dawnin a lang lo,” a ti a. ZPM pawh an phur phurin an phur viau a, an din hnu reilo teah rawng hrang hrangin Mizote hmaah an inzuar niin a sawi a. BJP-in a rawn len chhoh tan lai kum 1993 pawh khan Mizoram-ah BJP din a ni a, sorkarna a chan loh lai chuan an reh zui deuh a, tuna sorkarna an siam ngheh hnu hian an tangmar leh ta deuh niin a sawi.
Dr. L. Thangmawia hian, “MNF party chu Pathian thu leh ram leh hnam innghahna hmanga din a nih avangin kalphung nghet tak nei a ni,” a ti a. Hun harsa vawi eng emaw zah tawk mah se, Pathianin a khai ding zel niin a sawi a. “Sorkar hmasa hnathawh bak eng emaw zah MNF sorkarin a thawk zawm a, sum leh pai harsatna an tawh zawng zawng hi an sawi harsat chawp a ni lo va, a takin a harsa tak tak a ni,” a ti bawk.
MNYF Vice President Zodinpuia kaihhruai MNF Party chhung inkhawmah hian Joseph Zaihmingthanga’n hunserh a hmang a. MNF Vice President Lalthlengliana’n an party-ah mi thar a lawm lut bawk.