Aizawl: Mizoram Pradesh Congress Committee (MPCC) Vice President Lal Thanzara chuan Lunglei Municipal Council (LMC) inthlan lo awm turah Covid-19 hripui len laia Lunglei mipuite tana au ngam lo Lunglei lam MNF MLA-te avang pawh hian MNF hi vote tlak an nih loh thu a sawi.
Nimina Rahsi Veng, Lunglei-a LMC Ward No V-a Congress campaign office hawnnaah thu sawiin MPCC Vice President hian Covid-19 len laia mipuite thlabar tak leh mangang taka an awm laia Congress MLA, Zodintluanga Ralte-in khawl a lei hmang tangkai duh lotu chu MNF sorkar a ni tih hriat reng a tul tih sawiin, “RT-PCR khawl hman ngei a nih theih nana Lunglei mipuite tana au ngam lo, Lunglei lam MNF MLA-te avang pawh hian LMC inthlan lo awm tura an candidate-te chu fel tak tak ni mah se MNF hi Lunglei mipuite tan vote tlak an ni lo,” a ti.
ZPM chungchang sawiin Lal Thanzara hian, “Enchhin beisei mah se, enchhin khawtlai hman kan ni lo, lo sorkar ta pawh ni sela, an leader ber hi a CM ang em tih sawi har tak leh a ruka chhungkaw buai tak an ni,” tiin, MLA inthlan lo awm tur atana an thatna tur bial nia an hriatah candidate inchuhna nasa tak a rukin a awm mek nia sawi a tam hle thu a sawi bawk.
Lal Thanzara hian Congress sorkar khan Lunglei mipuite tan hmasawnna tam tak a lo thawk tawh tih sawiin, LMC inthlan lo awm turah hian an hmaah malsawmna leh anchhia awmin, malsawmna nei lo MNF party chu paihin mipuite tana malsawmna thlen thintu Congress party tana LMC candidate-te thlang tling turin mipuite a ngen a ni.
He hunah hian MPCC Gen. Secretary P.C. Lalthanliana, ex-MLA leh Ward No V, INC Candidate Lalenkawli Pautu bakah LDCC President K.L. Chhawnzauva te pawhin thu an sawi.