Excise & Narcotics Deptt., Serchhip district office-a Rs nuai 181 chuang eirukna thubuaiah he office-a superintendent ni thin, Rongura leh Serchhip Treasury office-a Asst. Account Officer Suakngura te chu court-in thiam loh a chantir a, Thawhtanniah hremna tur a puang ang.
Court of Special Judge (Prevention of Corruption Act) chuan he thubuaia thutlukna chu nimin khan a puang a. Court thuremnaa tar lan a nih danin Rongura hian kum 2011 atanga 2017 thleng khan salary bill 106-ah staff-te hlawh ngai renga siam tho siin grand total-ah a lo ziah belhtir thin a, bill an siama sum zawng zawng chu Rs. 1,81,58,871 a ni a, heta tang hian office pawipangah Rs. 8,10,506 hman a ni a, evidence atanga a lan dana Rongura eiruk chu Rs. 1,73,48,365 a ni.
Excise department-a thawkte hlawh tur bill dik lo taka siam chu khatihlaia Asst. Account Officer Suakngura’n awlsam takin a lo pawmsak thin tih leh Suakngura account-ah Rs 41,000 transfer-sak a ni tih court judgement-ah chuan tar lan a ni bawk.
He thubuaia hming lang, khatihlaia cashier, Sainguri Chenkual erawhin bill-te chu an pu, Suakngura’n a tihtir a nih thu leh sum a hmuhte chu office mamawha hman tura an puin a pek nia a sawi chu witness dang pahnihte thu nen a inmil avangin evidence a awm lova ngaiin sorkar witness-ah tantira chhuah zalen a ni.
Serchhip Excise office-a sum tihchingpen chungchang hi CAG lam audit atanga hmuhchhuah a ni a, excise department lam pawhin enquiry lain an lo finfiah tawh a, thubuai hi Anti Corruption Bureau (ACB)-in an chhui chhunzawm a, ACB chhuina, thuhretu hrang hrangte thu leh eirua puhte thusawi zirchianna atangin mi pahnihte chu thiam loh chantir an ni ta a ni.
Eiruk thubuaia thiam loh chantir tak, Rongura leh Suakngura te hi nimin khan central jail-ah dah luh nghal an ni a, Thawhtanni ah court-in anmahni hremna tur chu a puang dawn a ni.