Premier League club West Ham United chuan Europa Conference League quarter-final lut turin harsatna an tawk lo. Cypriot club AEK Larnaca chu mikhualin 4-0 in an hneh a, 6-0 aggregate in an tling.
London Stadium-ah hian Hammers tan English forward Jarrod Bowen chu a langsar a. Second half tan tir lamah goal hnih khungin England in Euro 2024 qualifier khel tur squad a puan zingah a tel loh hnuah a chetthat leh a pawimawh thu inkhel zawhah a sawi.
First leg a 2-0 a chak tawh Hammers hian Europe huap inelna a an chak chian ber tuma an goal khung zat ang bawk an khung a. A zawna season hnih nan Europe huap inelnaah quarter-final an lut.
Mahni mualah Hammers an chungnung chiang a, Larnaca nen an player-te theihna teh pawhin an inthlau.
An khingpuite hian tlarhnungah tihsual neiin Gianluca Scamacca chuan goal hmahruai a khung a. Halftime hma lawkin Gustavo Ledes chuan Pablo Fornals hlauhawm taka a tlawh avangin hnawhchhuah a ni.
Second half-ah Bowen-a’n goal hnih a khung hnuah kum 18 mi Divin Mubama chuan first team tana a inlan vawi thumna chauhah senior team tana a goal hmasa ber a khung ve bawk.
Hammers manager David Moyes chuan, “Season kallaiah hun pawimawh kan hmang dawn a, kan phur tawh a, kan inbuatsaih uluk erawh a ngai.” tiin an chak hnuah a sawi.
Inkhel dangah Dutch club AZ Alkmaar in Italy a che tha lai Lazio an paihthla.
Stadio Olimpico a 2-1 a hnehna chang tawh AZ hian 2-1 bawkin AFAS Stadion-ah an mikhualte hi an hneh nawn a, 4-2 aggregate in an tling.
Lazio tan Felipe Anderson chuan goal khung hmasa zawk mahse AZ tan hian Jesper Karlsson leh Vangelis Pavlidis ten halftime hma leh hnuah goal khat ve ve an khung.