Larsap Hari Babu Kambhampati-a’n nimin khan Zoram Medical College (ZMC), Falkawn a tlawh a, Zoram hmun hrang hranga doctor indaih lohna awm mek chu ZMC atanga MBBS zir zo an awm hunah a ziaawm a beisei thu a sawi.
Larsap chuan ZMC attached hospital-a ward thenkhat leh operation theatre te, academic block chhunga department hrang hrangte a tlawh bakah MBBS 3yr zirlaite a kawm bawk.
ZMC hotute nen an inkawmnaah larsap chuan Aizawl pawn lam hmun tam taka a zin chhuah tawhnaah doctor indaih lohna chu a taka a hmuh thu leh hmeichhe lam doctor leh naupang enkawltu doctor indaih lohna a nasat zual thu a sawi a. “Thingtlang lama doctor indaih lohnate hi ZMC atanga MBBS zir zo an rawn awm hunah a ziaawm a beiseiawm a, a nghahhlelhawm tawh hle,” a ti.
ZMC-in NMC pawmpuina nei tura hmasawnna ruhrel siam kawnga project proposal a siamte chu a theih anga lo nawrpui a tum thu pawh larsap chuan sawiin, a ngaih pawimawh em em pakhat chu ZMC department hrang hrangte chu hmanraw changkang zawk nena thuam that a nih thu a sawi.
ZMC Director Dr John Zohmingthanga’n ZMC chungchang, hmalakna kal mek leh hmachhawpte larsap chu a hrilhfiah a. ZMC-in NMC atanga recognition hmu tura an hmalaknate a sawifiah bawk.
ZMC-ah hian MBBS zirlai 488 awm mekin, heng zinga 270 chu hmeichhia niin mipa 218 an ni a. MBBS batch hmasa berte chuan intern leh house an zawh hnuah kum 2024-ah degree neiin an zir zo dawn a ni.
ZMC-ah hian zirtirna lama inhnamhnawih 144 leh non-teaching staff 554 awm mekin, an vaiin thawktu 698 an awm mek a, thawktute luah mek, residential quarters 225 a awm bawk.