Mizoram Chief Minister Pu Zoramthanga Delhi-a zin chuan Union Home Minister Amit Shah hmuin Shah hian thla thara Zokhawsanga Assam Rifles complex a rawn hawn tur thu an sawi dun niin CM hian a puang a. AR Lammual bula Laldenga Cultural Centre sak tur lungphum a phum nghal dawn bawk niin CM hian a sawi bawk.
He thu hi Mizoram mipui tan thu lawmawm a ni a. Kum za chuang kan khawpui laili lai taka an awm hi Mizo mipui hian hun rei tak kan ngaimawh tawh a. Aizawl khawpui laili lai atanga Assam Rifles sawnchhuah hi politics ball-ah kan hmang ta hial a ni. Kan politician-te inzawrhna pawimawh taka chang ta AR sawnchhuah hi thil awlai a ni lo a ni ang e.
MNF sawrkar hmasaah khan an chhuah dan tur ruahmanna pawh siam fel vek tawh ang thawthang khan sawi a awm tawh a. An la awp zui tur ram chin thleng khan inti hre deuh phei chuan an sawi a nih kha. Mahse, vawiin ni thlengin helai hmun hi an la thut nghet tlat a. Kum 2019-ah khan kan CM khan, “Nakkumah chuan helai hmun hi kan ta a ni tawh ang,” tiin a puang a. Hlim takin mipuiin kut kan beng a nih kha.
Mahse, hei kum 2023 kan lo thleng a. Sawnchhuah lam ni lovin Laldenga Cultural Centre din a nih tur thu leh Zokhawsang lama an complex hawn vel sawi a ri leh ta daih a. Ngaihtuahna a tikal thui deuh.
Mipuiin kan beisei chu Lammual leh a chhehvel kan sawrkar kuta a awm hi a ni a. Laldenga emaw, Lalthanhawla hming emawa building va sak lam kha a ni lo va. Sawrkar hmasa pawh khan lammual leh a chhehvel chu cheng vaibelchhe tam takin a chei a. Mahse, hman dawn chuan sipai dil a ngai tho a. Thuneihna kha an ta a ni tlat.
Zalen taka Mizo thuhnuai ngeia helai hmun hman hi mipui duh a ni a. Zokhawsanga hmun hawn hian lammual area chhuahsan lam a kawk em, Khatla ramah pawh hmun zau tak AR hian an nei reng a. Zokhawsangah changtlung zawkin neih belh mah sela helai an luah tlat a. Thuneihna an neih tho chuan Laldenga Cultural Centre hian kan lung a tiawi kher lo vang.