Spanish club Sevilla chuan an coach Jorge Sampaoli chu Pathianni zana Getafe laka 2-0 a an tlawm hnuah an ban a. Tun dinhmunah La Liga-ah match 12 khelh tur la neiin relegation zone chu point hnih chauhin an hlat.
Andalusia ram club hian Atletico Madrid laka 6-1 a an mualpho atanga kar hnih hnuah thutlukna lian hi an siam a. International football khelh a nih dawn avangin league-ah kar hnih an awl dawn a, hemi chhung hian insiamrem theihdan kawng dap an tum.
Kum 63 mi hi Sampaoli hi tun season a Sevilla in manager an ban pahnihna a ni a. October thla khan Julen Lopetegui chu season bul a hnuaia an tan chhiat em avangin an lo ban tawh.
“Getafe laka kan tlawm hnuah Sampaoli contract titawp turin thutlukna kan siam a, kan result avang khan tlak hlauhawmah kan awm mek.”
“Coach a nih hnuah table mawng lam team in a chhuahsan theih loh vang hian tunhnai inkhela an khelhdan te avangin he thutlukna hi kan siam.” tiin club in thuchhuah an siam.
Sevilla hian a thlaktu tur zawnna chu an kalpui tan nghal thu an sawi a, Nilaini hma ngei a coach thar neih theih an tum thu an sawi bawk.
Sampaoli hian kum 2017-18 khan Sevilla hi La Liga-ah palina a nihpui tawh a. Tun tumah hian match 31 enkawl hmanin vawi 13 a chakpui.