Colombian President Gustavo Petro chuan an rama ruihhlo tawlhtu pawl lian ber, Gulf Clan nena inkahhai a puan chu a titawp.
Petro-a hian cartel-te chu ‘buaina chi tuh leh firfiak’ tia sawiin venhim hna thawktute chu heng mi sual pawl lakah hian beihpui thlak thar leh turin a ti.
Inkahhai hi December-a siam kha niin president-in Colombia-a ‘muanna famkim’ a awm theihna tura a ruahmanna zinga mi a ni.
Inkahhai puan tihtawp a ni leh ta mai si hi Petro-a’n ralthuam nena inbeihna thleng thin tihtawp a tumna kawnga hlawhchhamna lian a tling.
Petro-a’n a thlak tak, Iván Duque khan an rama muanna a awm theih nan sipai chakna hmangin heng a bei nasa hle thin.
Hetiang lo ang tak hian Petro-a’n thuneihna a chan khan mi sual pawl lian tak tak awmte an tawpa buaina a reh theih nan tharum tel lovin, indawr tawna muanna thlen a tum a ni.
December 31, 2022 khan sorkar chuan Gulf Clan bakah National Liberation Army (ELN) leh Revolutionary Armed Forces of Colombia (Farc) pengte nen inkahhai puan a nih thu an puang ta reng a ni.
Mahse, kar hmasa maiah khan President Petro hian Gulf Clan chuan inkahhai an bawhchhia niin a puh a, tui kawng an bei a, rangkachak laichhuaktuten lungawi lohna an lantirna turah thuk takin an inrawlh bawk niin a sawi.
Gulf Clan member-ten police officer-te an kap niin Twitter-ah a tar lang bawk.
“Tun atang chuan Gulf Clan nena inkahhai a awm tawh lo. Venhim hna thawktute chuan heng mi sual pawl hi rang leh na takin an chhang zel tawh ang,” tiin a tar lang.
Colombia-a police hotupa, Henry Sanabria officer tam zawk inrintir niin Gulf Clan chet tamnaah thawn luh an ni tih a sawi bawk.
President Petro hian Gulf Clan hian dan lova chet leh mi beih an chin chhung chuan ‘inbiakna a awm thei rih dawn lo’ tih a sawi bawk.