- Ruata
Rei tak thawm a neih hnuah Hyundai Verna thar chu tihchhuah a ni ta a, design leh thil hrang hrangah thil thar kan hmu a, a mawiin a changkang hle a ni.
South Korea company hlun leh hmingthang Hyundai siam India rama mid-size sedan hralh tam em em Verna hi India market-ah chuan kan hmuhna a rei tawh a. Model chi hrang hrang pawh a tam tawh hle a, tunah hian a hmaa chhuak nena khiakhin pawha dang hlakin design thar nen an rawn tichhuak leh ta a. India ram market-ah kan hmu leh ta a, a elpui tur, a milpui deuh huanga awm dang Honda City, Skoda Slavia, Volkswagen Vitrus leh Maruti Suzuki Ciaz te nen an inel chhunzawm leh dawn a. A man lamah chuan naturally aspirated petrol variant hi Rs Nuai 10.89 – 16.19 man inkar a ni ang a, turbo-petrol variant te hi Rs Nuai 14.83 – 17.37 man inkar a ni thung dawn a, hei hi ex-showroom man a ni a, Aizawl man nen chuan a inang lo hret thei bawk a ni.
A khawl
EX leh S variant ho hian 1.5L naturally aspirated petrol (petrol khawl pangngai) a hmang dawn a, hei hian 113.4bhp power leh 144Nm torque a hmang a. Transmission lamah chuan 6-speed manual leh iVT gearbox te a hmang a ni. 1.5L turbo-petrol khawl chu a variant sang lam deuh, S and SX (O)-ah te kan hmu dawn a, heng variant te hian 6-speed manual leh 7-speed DCT automatic gearbox te duhthlan tur an nei a, a khawl hian 158bhp power leh 253Nm torque a pechhuak thei a ni.
Naturally aspirated khawl zawk hian petrol litre khat hmangin km 18.60 (Manual Transmission) a tlan thei a, auto transmission zawk hian km 19.60 (iVT) a tlan thei thung a ni. Turbo-petrol khawl zawk hian petrol litre khatin km 20 (MT) a tlan thei a, auto transmission zawk hian km 20.20 (DCT) a tlan thei thung a ni.
A ken tel thar
2023 Hyundai Verna hian thil thar hrang hrang – dual-display, pakhat 10.25-inch touchscreen infotainment system leh pakhat digital driver’s display bakah 8-speaker Bose sound system, touch-based climate control panel thar, driver adjustable power seat bakah ventilated & heated front seat te a nei dawn a. 2-spoke steering wheel thar, audio leh cruise control thunun theihna awm bakah wireless phone charger, dual-tone beige & black interior, leather upholstery, 64 ambient colour lighting leh BlueLink connected feature tam tak a keng tel a ni.
Advanced Driver Assistance System (ADAS) leh himna hmanraw dang
2023 Hyundai Verna chhuak thara thil thar langsar tak mai chu ADAS (advanced driver assistance system) tech hi a ni a. Hemi hnuaiah hian advanced safety feature 17 lai mai a awm a, heng zingah hian adaptive cruise control with stop and go, forward collision warning, blind spot collision avoidance assist, lane keep assist, lane following assist, lane departure warning, leading vehicle departure alert, high beam assist leh rear cross traffic collision avoidance assist te a tel a ni.
Heng bakah hian himna hmanraw dang – airbag 6, ABS with EBD, electronic stability control, hill start assist, front and rear parking sensors, tyre pressure monitor, electronic parking brake, lane change indicators leh keyless entry te a awm a. Hyundai chuan himna hmanrua, safety feature hi 65 lai a awm tih an sawi a, standard ang chuan variant tlawm berah pawh he himna hmanrua hi 30 a awm sa vek bawk a, a variant san dan zelin a tam belh zel a ni.
A lian zawk dawn
A hmaa Hyundai Verna lo chhuak tawh thin aiin 2023 Hyundai Verna a lian hret dawn a, a chhung pawh a zau hret dawn a. A dung, a vang leh a san zawng hi a indawt danin 4535mm, 1765mm leh 1475mm a ni dawn a. A wheelbase hi 2670mm a ni ang a, a boot space 528-litres a ni.
Design thar
A pawn lamah chuan 2023 Hyundai Verna hian Hyundai signature grille thar a nei a, a turn indicator hi triple-barrel LED reflector headlamp hnuaiah a awm a, LED light bar chu a hood-ah a phei pat mai a, a ORVM leh door handle-ah te hian silver finish kan hmu bawk a ni. He sedan hi rawng chi 9 – Altas White, Typhoon Silver, Fiery Red, Tellurian Brown, Starry Night, Titan Gray leh Abyss Black te a awm dawn a. Atlas White dual-tone leh Firey Red dual-tone pawh a awm a, hei hi turbo-petrol variant hoah a awm bik dawn a ni.