Pakistan leh Afghanistan ram zau tak chu lirnghing na takin sawiin mi 12 vel an thi a, mi dang 40 chuangin hliam an tuar bawk.
Magnitude 6.5-a na lirnghing hian in tichimin lei a timin nasa hl a, mipuite chu kawtthlerah hlauvin an tlan chhuak nasa hle.
An ram sanaa Thawhlehni zana lirnghing hi Afghanistan-a Jurm phiakuam, lir a nghin duhna lai hmun atanga intan a ni.
A sawi natna lai hmun hi a kilkhawrin mihring cheng pawh an tlem a, chhanchhuah leh puihna pawh a thlen muan deuh ngei a rinawm.
“Min sawi nasa hle a, tun hmain khatianga na kha ka la hre ngai lo,” tiin Kabul-a cheng, a chenna in chhawng ngaa sang atanga tlan chhuak, Khatera chuan AFP news agency a hrilh.
Thi zinga pakua hi Pakistan-a Khyber Pakhtunkhwa phaikuama mite an ni.
Mi dang pathum chu Afghanistan-a mi an ni tih an ram health ministry thupuangtu chuan a sawi a. Pakistan nena an inrina bul, Laghman province-ah naupang pakhat a thi tel tih AFP chuan a tar lang.
Lir a nghin lai tak hian chhungkaw tam tak chu an inah awm lovin Persian New Year (Norwuz) lawmin khawlai leh hmun danga an awm lai a ni.
An thenawm, Pakistan Prime Minister Shehbaz Sharif chuan disaster agency-te chu puih ngai apiangte pui thuai thuai turin a hriattir.
Lirnghing hi km 1,000 chuanga hla – India, Uzbekistan, Tajikistan, Kazakhstan, Kyrgyzstan, Afghanistan leh Turkmenistan-ah pawh hriat a ni tih European-Mediterranean Seismological Centre chuan a sawi.
Heng lai hmun hi Eurasian leh Indian tectonic plate intawhna lai a nih avangin lirnghing a thlen fona leh a nghin duhna lai hmun a ni.
Nikum June khan Afghanistan-a Paktika province-ah magnitude 5.9-a naa nghingin mi 1,000 chuang an thi a, kum 25 vel chhunga lirnghing an tawrh nat ber tum a ni.