Indian lemchang thiam chu Twitter-a Hindu nationalist-te ngaihdan sawiselna lam thil a tar lan avang leh politics thila thlir a hlawh zui avangin man a ni.
Chetan Kumar-a hi Thawhlehni khan Hindu nationalist-ten Hindutva ideology an vawrh mek chu ‘dawta innghat’ tia a tar lan avangin man a ni.
Tual chhung chanchinbute chuan Kumar-a hi Hindu la vawng tak pawlin police hnena complaint an thehluh hnuah man a nih thu an tar lang a. Karnataka-a police-te chuan ‘sakhaw thil a ni lo zawnga sawi’ leh ‘inhmelmakna thlen thei thil ti’-ah an puh.
Tual chhung court chuan chawlhkar hnih chhung judicial custody-a awm turin a ti phawt.
Tun hi kum khat awrh chhunga kum 40 mi, Kumar-a Twitter-a thu a tar lan avanga man a nih vawi hnihna a ni a. Nikum February khan Muslim hmeichhiaten sikula hijab an hman khap duhte petition ngaihtuah judge a sawisel avangin man a lo ni tawh, a hnuah bail-a chhuah a ni.
US khua leh tui, Fulbright atanga zir chhuak, Kumar-a hi chi inthliarna duh lo tak niin Karnataka-ah hian inthliarna dona lam hawia chetna a nei nual tawh.
Amah tantute chuan Kumar-a hian chi leh sakhua inthliarna a dona avang hian a laka police hnena complaint a tawng tam tawh niin an sawi a. Social media-ah zuitu sang chuang neiin a hna bakah politics-a a thlirna hrang hrang a tar lang thin.
A thawhna, Kannada tawng film industry pawh a lo sawisel tawh a. October khan film hlawhtling tak, Kantara-a mi vuina tihlan chuan Hindu kalhmang a ni lo tia a sawi avangin a lakah police-in thubuai an lo ziak lut tawh.
A lakah complaint tam hle mah se a tih ngai erawh a ti reng a ni.