Tunlai football a player ngaihven hlawh ber pawl chu Napoli striker Victor Osimhen a ni a. Khawvela club lian hrang hrangin nipuiah lakluh tumin an ngaihven.
Sum tamna Premier League club-te zingah Nigerian striker ngaihventu an awm nual a, a bikin striker mamawh Manchester United leh Chelsea te thawm a ring.
Nimahsela lakluh tum tan a awlsam dawn lo niin a lang a, Italy a hmun thenkhata an sawi danin Napoli hian an player manah hian Euro maktaduai 150 an beisei dawn.
Chiang zawkin
Nigeria international Osimhen hian tun season-ah inelna hrang hrangah goal 25 a khung tawh. Hei vang hian striker goal khung thei mamawh tan chuan ngaihven loh theih a ni lo.
A chetthatb avang hian Napoli in Serie A-ah point 18 in hma an hruai mek a, champion tura ngaih an ni tawh. UEFA Champions League-ah pawh goal khung thei hle in quarter-final a hruai thleng.
Kum 24 mi hian kum 2025 thleng Stadio Diego Armando Maradona-ah contract a la nei bawk a, hei vang hian a club in amah lei tumte lakah a man an chhiar to thei dawn viau.
Osimhen hian chhuah lam sawi lo mahse a hmalam hun chungchang zawhna chu, “Ka hma hun ka sawi thei lova, mahse ka kawng zawh hi a dik tih ka hria. Season tawpah ka agent te nen engkim kan sawiho anga, club nen pawh kan inbia ang.” tiin engmah a sawichiang duh lo.