India chuan Uzbekistan-a naupang 18 lai thihna nena inzawmna nei nia hriat khuh damdawi siamtute chu an siam chhuah phalna (manufacturing licence) a tihtawpsak.
January khan WHO-in Marion Biotech-in khuh damdawi an siam pahnih vangin heng naupangte hi an thi nia sawiin heng damdawi hi a nih dan tur lo anga siam a nih thu a puang.
Marion Biotech chuan WHO puhna hi a dik loh thu a sawi thung.
Uzbekistan-ah thihna a thlen hnuah hian India-a health ministry pawhin company-in damdawi an siam chu a chawlhtir nghal.
Nilaini khan Marion Biotech awmna, Uttar Pradesh sorkar chuan ‘a nghetin’ company-in licence a neih chu an tihtawpsak tih a puang zui.
“Noida khawpuia inbun firm hian tun atang chuan engmah an siam chhuak thei tawh lo,” tiin drug inspector Vaibhav Babbar chuan Hindustan Times chanchinbu hnenah a sawi.
Marion Biotech chuan hemi chungchangah hian engmah sawi an la nei lo.
India hi khawvela damdawi (generic) thawn chhuak tam ber niin ram thang mekte mamawh petu ber a ni.
Hetih lai hian tun hnaiah Indian firm-te hian an damdawi siam that tawk lohna avangin hmingchhiatna an nei ta zeuh zeuh va, mi thiamte chuan an siam dan hmang rinhlelhawm an tih thu an sawi tawh thin.
Marion Biotech laka hremna lek a nih hma hian sorkar laboratory chuan December khan damdawi sample 22 endikin an khuh damdawi siam zinga ‘hlauhawm a awm’ tih an hmu.
“Damdawi pawlh nasat leh tihchingpen nasa hian vantlanga harsatna a thlen thei,” tiin India-a Central Drugs Standard Control Organisation (CDSCO) inspector Asheesh Kaundal chuan a sawi.
Tun thla tirah khan Uttar Pradesh police chuan company-a thawk mi pathum chu an damdawi siama an pawlh nasat lutuk kaihhnawihah an lo man tawh.
Nilaini khan Uttar Pradesh-a Drugs Licensing Officer SK Chaurasia chuan Marion Biotech hian thil nihna dik tak an hriat theih nana hriattirna an pek chu an chhang mumal lo niin a sawi bawk.
Marion Biotech hi Indian drug maker zinga khuh damdawi vanga buai hmasa ber a ni lo.
October khan WHO chuan Maiden Pharmaceuticals-in khuh damdawi an siam an ei avangin Gambia-a naupang 66 zet chu kal tha lo vangin an thi tih a lo puang tawh a, khawvel pumah inralrinna a tichhuak bawk.
Indian sorkar leh company, Maiden Pharmaceuticals hian he puhna hi nasa takin an pha thung a, damdawi hi a him ngei niin an sawi ve ve a ni.