Brazil-a police chuan an ram chhung hmun hrang hrangah mi sual pawla mite ni ngeia an hriat an luh chhuak a, mi thah leh ruk bo an tum an hlawhchhamtir niin an insawi.
Mi sualte hian politician leh vantlang zinga langsar tak tak eng emaw zat bitum tumin ruahmanna an siam niin police chuan an sawi.
Brazil-a ei ruk thubuai lian ber ngaihtuahtu zinga mi judge hlui, Senator Sergio Moro pawh an bitum zingah hian a tel ni ngeia hriat a ni bawk.
Police chuan heng mi sual an mante hi Brazil-a mi sual pawl lian ber nen inkungkaihna an nei niin an sawi.
Police hian Nilaini khan an khawpui, Brasilia bakah Sao Paulo, Mato Grosso do Sul, Rondonia leh Parana state-a hmun 24 zetah an luhchilh a ni.
Mi sualte hian Brazil-a state 26 awm zinga panga velah cheta ‘mi thah leh tlanna sum uma mi ruk bo’ an tum a, an bitumte hi ‘sorkar hnathawk leh mi pawimawhte’ an ni tih police chuan an sawi.
“Sorkar hnathawkte hi thah tumna awm chu chhuia hriat chhuah a ni a. Vawiin hian Federal Police chuan heng mi sualte hi chhuiin man an ni,” tiin Justice Minister Flavio Dino chuan Twitter-ah a tar lang.
Dino-a hian mi sualte hian an tum tih chu a sawi lo va; mahse, Senator Moro chuan social media-ah amah leh a chhungte chu tum an ni tih a tar lang thung.
Brazil-a mi sual pawl thiltithei ber, First Capital Command (PCC) chu heng mite hi nia sawiin, amah leh vantlanga thawktute lakah phuba lak an tum niin a sawi bawk.
Minister pakhat chuan Reuters news agency hnenah he thil hi mi sual pawl thiltih liau liau a nih thu leh politics thil a nih loh thu a sawi.
Kum 2019 leh 2020 chhunga Moro-a justice minister a nih lai khan mi sual pawla an hruaitu lawk tak takte hrem leh an tanna hmun sawn a ni a, an zingah hian PCC hruaitu pawh telin venhimna khauh berna hmunah dah sawn a ni.
An pawl hi cocaine thawn chhuaktu lian an ni a, nikuma Paraguayan prosecutor hriat hlawh tak thah pawh an tih a ni.