Aam Aadmi Party (AAP) sorkarna dal theitu tur, Government of National Capital Territory of Delhi (GNTCD) (Amendment) Bill, 2021 chu India rorelna in hnuai zawk, Lok Sabha chuan Thawhtanni khan a pawm.
Sorkar laipui chuan politics a inrawlh lo niin a sawi a, India ram khawpui inenkawlna chungchanga thil hriatthiam loh awm thin a tihreh phah dawn niin an sawi.
GNTCD Bill, 2021 hi Congress leh AAP chuan Lok Sabha-a pharh a nih hnu hian an dodal nasa hle a, ram inkaihhruaina dan kalh a nih thu nasa taka an tlangaupui chungin pass a ni ta tho a ni.
Delhi Chief Minister Arvind Kejriwal chuan, “Lok Sabha-a bill kalphung sawi fiahin Delhi ‘sorkar’ tih chu ‘Lieutenant Governor’ tia thlak tumna a ni a, khawpuia cheng mipuite zah lohna a ni,” a ti.
Bill hi March 15 khan Lok Sabha-ah put luh a ni a. Delhi minister leh rorel lai, AAP MP-te, MLA leh councillor-ten Jantar Mantar-ah duh lohna an lantir a, lieutenant governor (LG) chu thuneihna pumhlum he bill hian a neihtir dawn tiin an sawi.
“GNCTD (Admendment) Bill pawm a nih theihna tura Lok Sabha-a vawiina put luh hi Delhi mipuite hmuhsitna a ni. He bill hian mipuite thlan roreltute thuneihna a titawp vek dawn a, tling lote hnenah thuneihna a pe zawk ang. BJP hian mipuite an bum a ni,” tiin Lok Sabha-a bill put luh niah Delhi CM Kejriwal-a’n twitter-ah a tar lang.