Education Minister Lalchhandama Ralte-in Gauhati High Court-in SSA zirtirtu dah nghet tura state sorkar a hriattirna order chu sorkar kuta hlan a nih hnuah zirchian a ni dawn tih nimina Mizoram SSA Teachers’ Association inkhawmpuiah a sawi.
MSSTA chuan nimin khan Chanmari YMA Hall-ah inkhawmpui an hmang a, hmanpuitu education minister chuan court thuremna a lo chhuah hma pawhin zirtirtu dahngheh duhtu a ni sa nia sawiin, court thuremna chuan hma lam hunah thui tak kawngro a sut a rin thu a sawi.
Education minister chuan sorkarin CSS hnuaia thawkte a ngaih pawimawh nia sawiin, “Zirtirtu chauh ni lo, CSS thawktu dangte pawh huamin hamthatna kawng hrang hrang an neih theih nan DP&AR-ah rawtna mumal tak siamin buaipui chhoh mek a ni,” a ti.
Lalchhandama Ralte chuan Samagra-a thawkte hlawh chungchang pawh sawiin, hlawh tihpun a nih theih nana remtihpuitu, chief minister leh council of minister-te chunga a lawmthu a sawi a, a hun taka hlawh an lak theih nan tan an la nasa nia sawiin, chief minister, finance changtu thahnemngaihna zarah state-in a tum ve tur, Rs. vaibelchhe 93 vel lai dah lawk a nih thu a sawi bawk.
MSSTA inkhawmpuiah hian an member boralte sunna hun an hman bakah hruaitu thar an thlang a. An member boralte ralna Rs 1,00,000 ni thin, Rs 1,50,000 ni tawh tura rawtna an pawm a. Tun hnaia Gauhati High Court, Aizawl Bench-in MSSTA leh education dept inkhinna thuremna a tihchhuah chu a hlawhtlin ngei theih nan chak taka hmalak an rel bawk a ni.