Aizawl: Electronics bungrua leh hmanraw lam siamtu company lian, VGuard Industries Ltd-in Corporate Social Responsibility (CSR) fund atanga an lei ambulance, Mahindra Supro ZX chu nimin khan Central YMA hnenah an hlan.
Ambulance inhlanna inkhawm tawi hi Central YMA Hall-a neih a ni a, ambulance hi VGuard Industries Ltd, North East Regional Branch Manager Nilotpal Bhattacharjee leh a thawhpuiten CYMA Treasurer Fabian Lalfakawma hnenah an hlan a ni.
CYMA treasurer chuan VGuard Company-ten Mizo mipuite tana thil ropui tak an tihsak chu lawmawm an tih thu leh Mizo mipuiten tangkai taka an hman tur thu a sawi a ni.
VGuard NE Regional Branch Manager Nilotpal-a pawhin thu sawiin Mizo mipuite tan eng emaw tak tih an duh a, ngun taka an ngaihtuah hnuah Central YMA hnena ambulance hlan chu an titlu ta tih a sawi a, Covid-19 hripui len lai khan Zoram Medical College-ah PPE suit leh face mask tha chi tam tham tak an lo hlan tawh thu leh a theih hun apiangah Mizo mipuite tan thil tha tih zel an tum tur thu a sawi bawk a ni.