March 29-a Lunglei Municipal Council (LMC) inthlan tur atan political party hrang hrangte ngawrh takin an campaign mek.
MNF party chuan nimin khan ward hrang hranga campaign office-ahte inkhawm an buatsaih a, heng huna thusawitu, MNF Adviser Dr. R. Lalthangliana chuan an party candidate-te chu thlang tling tura mipui sawmin, LMC dintu MNF-in Lunglei tihhmasawn nan mawh a phur ngam tih a sawi.
Dr R Lalthangliana chuan Lunglei khawpui tihhmasawn nan LAD chu a beitham nia sawiin, municipal council-ah chuan tha leh sum hrawl takin khawpui tihhmasawn a theih dawn niin a sawi a. LMC-ah MNF-in sorkar an siam chuan a dan a dang dawn nia sawiin, “Nau chu a hringtu ngeiin a enkawlin a thang tha thin,” a ti.
Congress party pawhin nimin khan Lunglei Chanmari-a an party campaign office an hawn bakah street campaign an chhunzawm a, thusawitu, an president, Lalsawta chuan an party-in Lunglei hmasawnna an ngaih pawimawh thu te, Lunglei khawpui chu tui hnianghnar zawka pek an tum thu leh Lunglei expansion road an ngaihpawimawh tur thu te a sawi.
Lalsawta chuan LMC inthlanah vote lei tuma chete chu hnawl ngam turin mipui a sawm a, Congress-in Lunglei tana hma a lo lak tawhna hriatsaka LMC-ah sorkarna pe ngei turin mipui a sawm a ni.
ZPM party chuan Nilaini zan khan Ward No. V huam chhúng, Hauruangah vantlang inkhawm an buatsaih a, ZPM Leader Lalduhoma’n LMC inthlanah ZPM candidate-te vote turin mipui a sawm.
ZPM hian nimin khan Lunglei khawpui chhung hmun hrang hrangah street campaign an nei chhunzawm a, ZPM star campaigner Dr. Vanlalthlana, MLA leh TBC. Lalvenchhunga, PAC member-ten thu an sawi bawk a ni.