US Open hmeichhe champion ni tawh Emma Raducanu leh Sloane Stephens te chu Miami Open-ah Ningani zing khan an tlawm a, round hmasa ber an paltlang zo lo.
British number one Raducanu hi kum 2019 US Open champion Bianca Andreescu chuan 6-3, 3-6, 6-2 in inkhel hmuhnawmah a hneh.
Player pahnihte hi tournament tan hma a inhliam nei ve ve an ni a, mahse an inkhel tawkin an tang dun hle. Set hmasa pahnihah service in break sak vawikhat chiah an nei.
Set thumnaah pawh an inum zak zak a, mahse a tawpah Andreescu hian game li a zawna a lak chu a chakpui.
“Miami-ah hian player tha inkhel an tam thin a, chuvangin thil beisei lawk dan tur leh rinlawk thiam a har thin. Ka theihtawp a tha a khelh kha ka duh ber a, ka duh ang ngeiin ka khel in ka hria.” tiin seeded number 7 Maria Sakkari hmachhawn leh tur Andreescu chuan a sawi.
“Emma a kheltha tak zet a, player tha bik a ni. A theihna sang hi ka ngaisang a, a hnuhma leh result neih thinte hian a thatzia a tilang.” tiin a khingpui a fak bawk.
Kum 2017 US Open champion Stephens hi 6-4, 3-6, 6-2 in Shelby Rogers chuan a hneh ve thung a. Kum 2018 a a champion-na hmun a chhuahsan lehnghal a ngai.
Rogers hian round hnihnaah hian Australian Open champion ni lai leh world No. 2 Aryna Sabalenka a hmachhawn dawn a. Anni pahnih hi kumina Melbourne Park a inelnaah pawh khan lo intawng tawhin round hnihnaah Sabalenka hian a hneh.
Kar hmasa khan Sabalenka hian Indian Wells Masters final a khel.
Mipa inelna lamah Grand Slam champion vawi thum ni tawh Andy Murray chu 6-4, 7-5 in Dusan Lajovic lakah a tlawm.
“Ka service a tha viau in ka hria a, mahse a bak zawng kha vawiin chu a fuh tawh lo. Tihsual tam tak ka neih ngai loh thin ka nei a, ka che vel a rang tawk lo bawk a, hei hi ka inkhelh danah chuan a pawimawh hle.” tiin Murray chuan a thlirlet.
Hmeichhe champion ni lai leh world number one Iga Swiatek chuan a nakah hliam a neih avangin round khatnaah hnehna chang mahse a khelh zawm thei dawn lova, a inhnukdawk.
Kum 21 mi hian a hliam hi khuh nasa in a tihbuai vang a ni a, thla tharah Billie Jean King Cup pawh an ram tan a khelh loh tur thu a sawi chiang nghal bawk a ni.