Indian football team chuan Tri-Nation International Football Tournament-ah Myanmar 1-0 in an hneh.
Imphal a Khuman Lampak Stadium a inkhelah hian India tan Anirudh Thapa chuan first half tawp dawnah goal a khung a. Goal luh belh tawh lo mahse India hian goal khung theihna hun engemaw zat an hloh.
Bangladesh nen an pathum a friendly an khelh tura an match hmasa berah India tan Lallianzuala Chhangte leh Bipin Singh te chu wing-ah dah niin Myanmar chhaihbuaitu ber an ni fo.
An ball lakluh a hlauhawm thin a, an ke atangin hlauhawm a chhuak hnem a. Sunil Chhetri chuan Anirudh Thapa ball cross a tauh lut teuh bawk.
Imphal chhuanvawr Jeakson Singh chuan muallai luah nghetin India in inkhel an thunun zawk a. Lianzuala thawhrah sengin Chhetri-a’n first half-ah goal a khung teuh viau hnuah halftime dawnah Anirudh Thapa in goal a khung ta a ni.
India coach Igor Stimac chuan goal tam zawk khung thei an nih thu a sawi a. An inkhelah a lungawi tih a sawi.
“Ka tan chuan result kha 1-0 ni lovin 3-0 a ni. Zaninah ka player te lakah kha bak beisei theih ka nei lo. Goalkeeper Amrinder a kheltha tak zet. Sunil a vanduai a, goal a khung lo. Goal khung phu in a khel a, hattrick siam tur a ni.”
“Sunil hi kan training camp a player inlan hma ber a ni a, season rei tak hmang mahse national team zawm hma a chawlh phawt a tum lo. Hei hian a inpekna leh tumruhna chiang takin a tilang. A fit tha hle a, ni thum pawh a inkhel thei ang.” a ti.