Aizawl : Minister Lalruatkima’n “Zo hnahthlak hnam hrang hrangin ma- hni puala tlawmngai pawl kan neih te inpumkhata, ram leh hnam hmasawn nan tum thuhmun neia mahni zawnah theihtawp chhuah tlan a tul” a ti.
Siaha district-a Tipa ‘V’ (Tuipang ‘V’)-a Chhimtuipui group YMA inkhawmpui a hmanpuinaah he thu hi nimin khan Lalruatkima chuan a sawi a. “Ramin ri nei mahse, ramriin hnam a then thei lova, hnam inpumkhatna a tichhe thei lo” tiin, Zo hnahthlakte chu ram inrelbawlnaah khawvel ramriin daidang mahse, ram hrang hranga Zofa te chhiat/thatah inngaihvena, inunauna lantir zel a nih avanga lawmawm a tih thu a sawi.
Myanmar leh Bangladesh ram chhung buaina avanga an sahimna zawnga Mizorama tlan lut Zo hnahthlak te tlawmngai pawl hrang hrangin an lo kuahkhawm dan leh sorkar pawhin a theih ang anga a lo tuamhlawm dan chuan Zofate inngaihsakna chu a tichiang hle niin Lalruatkima chuan a sawi a. YMA inkhawmpui thupui ‘Ram leh hnam humhalh’ chu thupui pawimawh, ngaihthah thiang lo a nih thu sawiin, ram leh hnam humhalh turin zirna uar, ruihhlo laka fihlim leh fa hrin tam te chu hmalakna tur pawimawh a nih thu a sawi.
YMA member mipate chu pasal tlak leh chhungkaw enkawl tlak nih tum tur leh nulate pawh Zo hnahthlak fa chauh hrin tum tura chahin, chu chu ram leh hnam humhalhna kawng pawimawh tak a nih thu Lalruatkima chuan a sawi a. “Mizote chu hnam tlawmngai, hnam taima, hnam rinawm leh hnam huaisen kan nih angin, inkhawmpui palaite chu chu nihnaa chianna chu hawnpuia, nitin nunah a taka nunpui turin ka chah a ni” a ti bawk.