Nagaland assembly 14-na, Neiphiu Rio-a kaihhruai sorkar chu party tinin an thlawp dawn emaw tih laiin Naga People’s Front (NPF) MLA Kuzholuzo Nienu chuan an party chu rorelna inah eptu thutnaah an thu dawn tih a sawi.
NPF hian tun hnai inthlanah khan bial hnihah hnehna an chang a ni.
Assembly thara thutkhawm hmasak ber neiha larsap thusawi laka lawmthu sawina motion sawihonaah Nilaini khan Nienu hian NPF chu eptu khauh tak an ni reng dawn tih a sawi a ni.
Hetih rual hian an party chuan sorkarin hmasawnna hna a thawh leh muanna a awm theih nana a beihnaah tha taka thawhpuiin a thlawp zel dawn tih a sawi tel bawk.
Nienu hian MLA-te chu an fund neihte hmasawnna hna thawh tak tak nana hmang turin a ngen a. Sorkar pawh ‘Vision Plan of 5 years’ siama kum nga lo awm leh tur chhunga a kal dan leh programme a neihte tihlawhtling turin a ngen bawk.
Inner line permit (ILP), Register of Indigenous Inhabitants of Nagaland leh dan lova pem lutte a ngaimawh thu Nienu hian a sawi bawk a ni.