Aizawl: Khawvel puma TB dona ni, ‘World TB Day’ chu nimin khan khawvel hmun hrang hrangah hman a ni a, Mizoram pawh he ni hi hmun hrang hrangah hman a ni a. Aizawla hun hmanpuitu, Larsap Hari Babu Kambhampati chuan India ramah kum 2025 a ral hmain TB natna tihrem tum a nih thu a sawi.
Larsap chuan TB natna nuai bo tumin khawvela ram zawng zawng an intiamkam tih sawiin, Prime Minister Narendra Modi kaihruaina hnuaiah India ramah pawh kum 2025 a ral hmaa TB natna tihrem tuma hmalak a nih thu a sawi.
TB veite chaw tha pek kawngah pawh hmalak zel a nih thu larsap chuan sawiin, Nikshay Mitra hnuaiah minister leh MLA thenkhatte, ADC hotute leh mi mal thahnemngaiten chhawmdawlna an pe mek tih a sawi a. Mizoramah TB vei mi 2,000 chuang an awm mek thu leh an tana chaw tha leina thawhtu erawh mi 72 chauh an la awm thu sawiin, hemi kawnga inpe zel tur hian mipui a sawm bawk.
Nikum chhung khan Mizoramah TB vei 2,081 hmuhchhuah a ni a, TB thihpui mi 74 an awm a. Nimina Aizawla World TB Day hmannaah hian TB vei dam chhuakten thu an sawi bawk a ni.