Aizawl: Lawngtlai Sub-Headquarters MSTA leh Lawngtlai General Headquarters PSTA te tangkawp hma laknaa sak, Lawngtlai College Venga zirtirtute khualbuk, Teachers’ Inn chu nimin khan Mizoram Legislative Assembly Deputy Speaker H. Biakzaua’n a hawng.
H. Biakzaua chuan Teachers’ Inn banga chhinchhiahna lungphek phum zar hliahna puanzar pawt hawngin, kawngkharpuia ribbon zam a cheh chah hnuah kawngkapui a hawng a. Teachers’ Inn chhung lam chu fang kual nghalin hemi hnu hian conference hall-ah building thar lawmna inkhawm buatsaih zui a ni.
He hunah hian H. Biakzaua chuan Teachers’ Inn lungphum chu amah ngeiin a phum thu leh hun reilo te hnua hawn theiha peih a ni ta leh amah ngeiin a hawng leh thei chu lawmawm a tih thu a sawi a. Mizorama Teachers’ Inn nei thei khawpui an la tam loh laia Lawngtlaiin a nei thei chu district tan mellung pawimawh tak leh hmasawnna chhuanawm tak nia a hriat thu sawiin, mahni insengsova hma latu, Middle School Teachers’ Association (MSTA) leh Primary School Teachers’ Association (PSTA) te chu fakawm a tih thu a sawi a. “Teachers’ Inn chu a mamawhtute tan thlamuang taka innghahna tur hmun tha tak niin, a bik takin thingtlang lam atanga hmunpuia tul leh pawimawh tia kal zirtirtute tan a tangkai lehzual hle dawn a ni,” a ti.