Parliament budget session neih mekah nimin khan Union Railways Minister Ashwini Vaishnaw-a’n Rajya Sabha MP K. Vanlalvena zawhna chhangin Bairabi leh Sairang inkar rel kawng siamna turin kum 2023-2024 atan Rs. vaibelchhe 915 ruahman belh a nih thu house a hrilh.
Union railway minister chuan Bairabi – Sairang rel kawng siam nan hian Rs. vaibelchhe 5,021.45 sanction a ni tawh tih sawiin, “Rs. vaibelchhe 7,000 senga he hna hi zawh theih beisei a ni,” a ti a. Hna zawh theih beisei hun chungchanga K Vanlalvena zawhna chu tun dinhmunah chuan chhan hrang hrang avanga sawi chian theih a la nih rih loh thuin a chhang.
Sihhmui atanga Mizoram chhim tawp, Zorinpui thlenga rel kawng siam tumna a awm leh awm loh zawhna pawh railway minister chuan Sihhmui – Zorinpui Rel kawng siam tumna a awm rih loh thuin a chhang a. Rel kawng siam hna chu a tul dan azira thawh thin a nih thu leh mamawhna leh kawng hrang hranga a tangkai dan tur thlir chunga siam thin a nih thu a sawi bawk.