Tornado-in US-a chhim lam state pahnih, Mississippi leh Alabama a nuaiah mi 26 vel an thi a, chhiatna dang pawh a thlen hnem hle.
Mi zawn leh chhanchhuah hna thawh mek zel a ni a, Mississippi state sorkar chuan emergency a puang bawk.
Rolling Fork khuaah chuan car chhiar tam tak bakah kawtthlerah leirawhchan leh darthlalang keh them a tam hle a, a khaw pum hi tornado hian a tichhia a ni.
Mi cheng pakhat chuan a tawmnaa inbual kuang (bath tub)-ah biruin a him hlauh chu a vannei tak zet tih BBC a hrilh.
An thenawm, khawthlang lama Sharkey County-ah thil pangngaia awm a awm mang lo.
A hual veltu lote chu a khawih lo va, thingkungte erawh thlipuiin a nuai lam hawi zawngin an awm vek thung.
Tornado kalkawnga awm inte chu a chhe darh vek hlawm a ni.
Mi 2,000 chauh chenna thingtlang khuaah hian mi panga zela pakhat hi rethei (below the poverty line) an ni a, an inte chu tornado hian a chhem chhe vek a ni.
A hma darkar 24 liam ta leka chhungkua leh thian tha awm khawmna, kartawp hman an tumna inte chu a chhe darh vek a ni.
Thinga siam frame hrang hrangte chu a darh vek a. Puan suk khawlte pawh a len chhe vek bawk a, choka bungruate pawh hriat hran har khawpin an bungrua a darh hlawm a ni.
Lirtheite pawh khawlaiah a let nasa hle a, naupang inawmlemna bungrua ni awm takin khawlaiah a let darh heng huang hlawm a ni.
Tornado hi Zirtawpni zanlai (India-a Inrinni chawhnu her)-a thleng niin mi tam zawk an mut avangin inralrinna dar ri pawh an hre lo va. A hre hmasaten an hriat hmasakna chu thawm bengchheng lutuk vang chauh a ni.
Francisco McKnight chuan a dam chhuak chu thil mak a nih thu BBC a hrilh a. Inralrinna tur a hriat awm chhun chu ri a nih thu a sawi a, khatiang reng renga thli thawm a la hriat loh thu leh hriat nawn leh pawh a duh loh thu a sawi.
A hawi chhuak zawk a, bual inah tlan lut lehnghalin bath tub-ah a tawm nghal a, chu chu a him chhan niin a sawi.
An ina thil ding la awm chhun chu an bual in bang pahnih chauh a ni tih a sawi bawk.
Tornado hi minute nga atanga 10 inkar vel chauh thawk mah se an in chu a len chhe hman vek tih a sawi a. Tunah chuan awmna tur an siamah mi dang nen an awm rih tih a sawi.
Engnge a tih leh tur ber pawh a la hriat loh thu leh engtin nge a indin that leh ang tih a ngaihtuah nasat thu a sawi.