Aizawl : World Water Day denchhena hmalakna kal zelah Inrinni khan Lungleia Nghasih lui thenfai hnatlangpui koh a ni a. North East Initiative Development Agency (NEIDA), UD&PA, PHED, Project Save Tlawng, Clean Lunglei, KTP Venglai branch, YMA Sub Hqrs Lunglei leh YMA Ramthar branch te hmalaknaa hnatlang hi koh niin, mi 100 chuang an thawk chhuak a ni.
Lunglei Bawrhsap, District Sanitation Task Force Chairman ni bawk Ramdinliani pawh hnatlangah hian telin, sorkar department-te leh tlawmngai pawl ten an thahnemngaihnaa Nghasih lui thenfai gnatlangpui an ko chu lawmawm a tih thu a sawi a, hnatlanga thawkchhuak zawng zawng lawmthu a hrilh.
Bawrhsap chuan Lunglei khawpuiin lui a neih pawimawh berte zing ami, an tui tlan ber Tlawng lui fintu Nghasih lui kam leh a chhehvelah bawlhhlawh chitin reng a tam em em chu veiawm a tih thu sawiin, “faina leh thianghlimna kawngah hmasawnna tur kan la ngah hle a ni”, a ti a. Bawlhhlawh paihna hmun atana ruatah chauh paih thin turin mipuite a chah.