Aizawl: MNF Adviser Dr R Lalthangliana chuan Lunglei Municipal Council (LMC) awm tha lo titute hian an candidate hnukdawk ngam mai lo em ni tiin a zawt.
Inrinni khan LMC inthlan lo awm tur atan ward hrang hrang fang chhunzawmin Serkawn, Zotlang, Lunglawn, Theiriat, Chanmari, College veng leh Ramthar-ah kawtthler campaign an neihnaah thu sawiin Dr R Lalthangliana chuan party thenkhatin MNF chu Lunglei lam ngaihthah leh engmah thawk lo anga an sawi chu chhang letin, Mizorama integrated laboratory lian ber chu Lunglei-ah an dah tawh thu te, puitling leh naupang ICU la awm ngai lo pawh Civil Hospital, Lunglei-ah ICU 28 hawn fel tawh niin Mizorama trauma facility centre hmasa ber neihna hmun chu Lunglei a nih thu a sawi a. Rs. vaibelchhe 14.43 zet senna, Lunglei bazar building sak tur lung an phum tawh thu te, Lunglei By-pass road atan cheng vaibelchhe tam tak ruahmanna an siam thar thu leh NHIDCL hnenah tender pek niin, MoRTH chuan DPR siam tur tender a chhuah thu a sawi bawk.
Dr R Lalthangliana hian Assam Rifles-te pawh a order mai ni lo, an bungbel nen Zokhawsang lamah Chief Minister Zoramthanga kaihhruai sorkar chuan a suan phei ta chur chur mai chu lawmawm a tih thu a sawi a. “Pathianin MNF chu a hruai a, Pathian khawngaihna a zarah state-ah sorkarna kan siam zawm leh ang a, LMC-a kan thlan tharte nen tha takin kan thawk ho ang,” a ti.
MNF adviser hian inhnukdawh hun pek tawh mah se LMC awm tha lo titute hian candidate an inhnukdawk ngam mai lo em ni tih chu a zawhna a nih thu sawiin, “Keini chuan a hlutna leh thatna kan hria a, kan LMC sorkar thar siam hmangin Lunglei khawpui hi kan chei dawn a ni,” a ti bawk.