Aizawl: Mizo National Youth Front (MNYF)-in Lunglei khawpui tan ni 100 inhlawhna kalpui zel a nih theih nan MNF sorkarin budget-ah a dah fel tawh anga thuchhuah an siam chu Congress party chuan thu belhchian dawl lo a nih thu leh dawt hmanga Lunglei mipui bum tumna a nih thu nimin khan thuchhuah siamin an tar lang.
MPCC chuan sorkar kum thar tur, 2023-2024-ah ni 100 inhlawhna (MG-NREGS) atan sorkar laipui (CSS) atangin Rs. nuai 11,000 hmuh beisei a ni a, hei hi sorkar kum kal mek 2022-2023 chhunga hmuh tur zata chhut, Rs. nuai 22,462 aiin, Rs. nuai 11,462 zetin a tlem zawk a. Sorkar kum kal mek leh sorkar kum thar tura ni 100 inhlawhna atana CSS hmuh beisei zat hi a inthlauh em avangin LMC ding mai tur Lunglei mipuite tan hian budget-ah engmah an dah lo zawk tih hi kum 2023-2024 budget document atangin awlsam taka finfiah mai theih a nih thu an sawi.
March 25, 2023-a MNYF-in ‘LMC awm dawn mah se Lungleiah mipuiten ni 100 inhlawhna an kalpui zel theih nan MNF sorkar chuan budget-ah a dah fel tawh’ tia chhuah siama hetianga dawt chiang tak hmanga Lunglei mipuite bum tumna hi Lunglei mipuite zah lohna leh tham lohna nasa tak a nih avangin inthlanna awm turah MNF candidate zawng zawngte vote lo ngam turin Lunglei mipuite an sawm tih an sawi bawk.