Italian manager Antonio Conte chuan hun engemaw chen atang Tottenham Hotspur a chhuahsan dawn nia a lan hnuah a takin a thleng ta a. Thla 16 a lo enkawl tawh club chu chhuahsan turin club nen inremna an ti fel.
Conte hian tunhnaia an inkhel hnuhnung berah Southampton nen an inhnehtawk tumin a player-te chu sawisel chiamin club pawh a bei tel vak mai a, hei hian ngaihven a hlawh hle.
Italian coach hlawhtling hian a player-te chu mahni hmasial leh an dinhmun a lungawi hma lutukah a puh a, tin club rilru puthmang chu sawiselin trophy pawimawh chuh tak tak ngai lo rilru a awm tiin a sawisel.
Tun dinhmunah Tottenham hi league-ah palina an ni mek a. Cup inelna leh Europe huap inelna atangte in an tla fel vek tawh.
Chairman Daniel Levy chuan Conte chhuah thu an puan hnuah, “Premier League game 10 kan la nei a, Champions League khelpha ngei turin intlansiaknaah kan tel dawn. A tha thei ang bera kan kal a ngai.”
“Kan zavaiin kan tanrual a, rilru hmunkhat nei a kan beih a ngai. Kan club leh kan club tantute tan a sang thei ang bera league a kan awm hi a ngai a ni.” tiin a sawi.
Conte-a assistant ni reng Cristian Stellini chu tun season tawp thleng head coach a ni dawn a, Spurs midfielder hlui Ryan Mason chu a thachhangdawltu a ni ang.
Conte chhuah avang hian Spurs in kum 2019 a Mauricio Pochettino an ban hnua manager nghet palina ni tur an zawng dawn tihna a ni.
Chelsea, Juventus leh Inter Milan te lo hlawhtlinpui tawh Conte hian November 2021 khan Nuno Espirito Santo thlakin Spurs hi a enkawl tan a, a hnuaiah vawi 76 inkhelin vawi 41 a chakpui laiin vawi 23 an tlawm.
Conte thlak tur hian Pochettino leh Julian Nagelsmann te hming a ri ring.