Egypt-a thil hlui lai chhuaktu, archaeologist-te chuan Pharaoh Ramses II hnena temple-a an hlan ni ngeia ngaih, tawih thei lova siam (mumy)-a beram lu 2,000 chuang zet an lai chhuak tih tourism & antiquities ministry chuan Pathianni khan a puang.
Tawih thei lova ui, kel, bawng, gazelle leh mongoose an siam pawh New York University-a US archaeologist-ten Egypt chhim lama temple leh thlan hlui tamna, Abydos-ah an lai chhuak.
America atanga thawk chhuakte hotu, Sameh Iskandar chuan berampa lute hi ‘Ramses II a thih hnu kum 1,000-na puala an hlan’ niin a sawi.
Ramses II hian Egypt-ah hian kum 70 dawn, kum BC 1304 atanga BC 1237 thleng ro a rel nia hriat a ni.
Egypt-a Supreme Council of Antiquities hotu, Mostafa Waziri chuan heng an thil hmuh chhuah tharte hian Ramses II temple chungchang leh an thiltih vel tam tak bakah kum BC 323 leh 30 inkara Ptolemaic hun laia thil tam tak an hriat belh thei dawn niin a sawi a. Temple hi BC 2374 leh 2140 inkara sak a ni.
Ran mummify an laih chhuah bakah hian archaeologist-te hian lal in hlui bang, metre nga zeta chhah, kum 4,000 vel liam tawha mi an lai chhuak bawk.
Milim te, papyri te, hman lai thingkung te, savun kawr leh pheikhawkte an hai chhuak bawk.
Abydos hi Cairo chhim, Nile lui atanga km 435 vela hlaa awm niin temple hlui a tam avanga hriat hlawh a ni.
Cairo hian thil hlui hmuh chhuah a nih thu a puang fo thin a, hengte hi politics leh eibar lam thila an hlawkpui ai mahin an khawsak phungte hriat theihna atana tangkai a ni.
Mihring maktaduai 105 vel chenna, Egypt hi eibar dinhmunah a hniam lai niin khualzinah an innghat nasa a, an ram sum thawh chhuah 10% zet a tling hial a, mi maktaduai hnih zet tourism lama thawk an nei bawk.
Cairo hian kum 2028-ah chuan tourism hi tuai nun leh hman an tum a, kum khatah mi maktaduai 30 tal an ram tlawhtir an tum a, coronavirus len hma khan mi maktaduai 13 velin an tlawh thin.